Artxiboak: Apirila, 2009
26
Api
Egilea janirefragua
Athleticek beste pauso garrantzitsu bat eman du mailari eusteko helburuari begira. Salbazioa ez dago matematikoki ziurtatuta, baina Caparrosek esan duen bezala, gaur Racingen aurka lortutako 3 puntuak erabakigarriak izan daitezke.
Fernando Llorente izan da protagonista erasoan egindako lan bikainagatik, baina bere gainetik Gonzalez Vazquez epailea nagusitu nahi izan da San Mamesen, 17 txartel hori eta gorri bat aterata. Talde zurigorria 9 jokalarirekin utzi du eta Racing 8rekin, gogorra izan ez den partidu baten.
Athleticek lehen zatian joko aldetik egindako lan apartari etekina atera dio. Llorentek abisua eman du baloia langara bidalita 7. minutuan, baina 21.ean ez du huts egin aurrelari nafarrak eta Coltorti gainditu du buruz Koikiliren erdiraketa bat sarera bidalita. Konfiantza berreskuratu du Llorentek Numantziari egindako golaren ostean eta gaurkoan arazo handiak sortu dizkio Santanderrekoen defentsari.
Caparrosen taldea nagusi izan da lehen zati osoan arriskua eramanda behin eta berriz Racingen ate ingurura. Bi hegaletatik eraso egin du Athleticek eta 41. minutuan partidua ia erabakita utzi du bigarren golarekin. Llorenteren jokaldi baten ondorioz, hain zuzen, iritsi da. Aurrelaria arean sartu da eta Lucenek penaltia egin dio. David Lopezek bikain jaurti du 2-0ekoa egiteko atsedenaldia baino lehen.
Bigarren zatiari, ordea, oso kontzentratuta ekin dio Racingek. Partiduaren erritmoa eta agintea berreskuratu dute kantabriarrek eta Lucen Iraizoz ezustean harrapatzeko zorian egon da 56. minutuan, baina areaz kanpo egindako jaurtiketa langara joan da. Barkatu egin du Racingek aurrenekoan, baina ekitearen ekitez, euren saria lortu du. Yestek Pereirari egindako penaltia adierazi du epaileak eta Pinillosek ez du barkatu. 2-1 eta urduritasuna agertu da harmailetan eta zelaian bertan ere. Yestek bigarren txartel horia ikusi du eta bere kanporaketarekin hasi da karrusela. Gonzalez Vazquezek Marcano, Pinillos, Orbaiz eta Pereira ere kaleratu ditu.
Athleticek kostata eta sufrituta baina markagailuari eustea lortu du. 3 puntu garrantzitsu Sportingen aurkako neurketaren aurretik. Albiste txarrak Etxeita eta Iraolaren lesioekin iritsi dira. Aste honetan jakingo dugu bi jokalari hauek datorren igandean Molinonen izango diren ala ez. Momentuz, Orbaizek eta Yestek, ezin izango dute jokatu.
Erlazionatutako sarrerak
22
Api
Egilea janirefragua
Athleticek arnasa hartzeko urrezko 3 puntu eskuratu ditu gaur Numantziari 1-2 irabazita. Soriako taldea aurreratu da Cismaren gol baten bitartez, baina Toquerok eta Llorentek buelta eman diote markagailuari.
Hilabete baino gutxiago falta da Kopako finalerako eta burua Mestallatik at mantentzea zaila da. Hala ere, Ligan etxeko lanak egin beharra dute zurigorriek eta gaurkoan taldea jaitsiera postuetatik aldentzen duen garaipena lortu dute Caparrosen mutilek.
Gogotsu ekin diote bilbotarrek neurketari Javi Martinezek urrutitik egindako jaurtiketa batekin eta Llorentek kanpora bota duen burukada baten bidez. Abisua eman bai, baina 10. minutuan maldan gora jarri zaio neurketa Athletici. Cismak baloia jaso du area ertzean eta bere jaurtiketa indartsua jokalari zurigorri batean jo eta Iraizozen atean sartu da. Kolpe gogorra lehoientzat.
Athleticek ez ditu besoak jaitsi eta 4 minutu geroago Toquerok ezin izan du errematatu Yesteren erdiraketa. Llorenteri egindako penaltia eskatu dute bilbotarrek baina epaileak ez du ezer ez adierazi. Gola lortu ezin eta gauzak okertu egin dira zurigorrientzat. Aitor Ociok bigarren txartel horia ikusi du Goiria bultzatzeagatik eta 10 jokalarirekin gelditu da Caparrosen taldea.
Numantziak norgehiagoka erabakitzeko aukera izan du 24. minutuan baina Dimasen jaurtiketa areaz kanpotik langara joan da. Eta Soriako taldearen aukera batetik berdinketaren golera 5 minutu geroago. Toquerok Juan Pabloren atea zulatu du eskuinkada bikain batekin. Juanrak huts egin du pasean eta aurrelari zurigorriak baloia jaso eta eskuairatik barrura bota du.
Partidua guztiz irekita zegoen eta Iraizozek Txomin Nagoreren urruneko beste jaurtiketa bat gelditu du. Abaguneak area batean eta bestean gertatu dira. Athleticek izan ditu bigarren gola egiteko aukerarik argienak atsedenaldi aurretik baina Koikilik eta Susaetak ez dute asmatu.
Banakoarekin joan dira bi taldeak aldageletara baina bigarren zatia hasi eta 2 minutura Llorentek zurigorriak aurreratu ditu. Aurrelari nafarrak baloia jaso du area ertzean, Numantziako jokalari bat gainetik kendu eta baloia ondo baino hobeto gurutzatu du. Juan Pablok ezin izan du baloia ikutu eta gola markagailura igo da. Zoratu egin dira Caparrosenak 1-2koarekin.
3 puntuak eskuratzea ezinbestekoa zen gaurkoan eta ez zuen ematen Athletic bat gutxiagorekin jokatzen ari zela. Numantziak baloi geldituan eraman du arriskua Iraizozen ate inguruan, batez ere, Barkero Realeko jokalari ohiaren falta jaurtiketekin. Azken ordu erdian gauzak berdindu egin dira Borisek bigarren txartel horia ikusi baitu. Hala ere, Pachetaren mutilek lehen mailan jarraitzeko ametsari eutsi nahi zioten eta hortzak estutu dituzte. Gola egiteko aukerarik onena, ordea, Athleticek izan du 75. minutuan. Yestek bikain jaurti du baina Juan Pablok, berriz, baloia atera du.
Partidua bukatu aurretik Goiriak eta Llorentek beste golen bat sartzeko aukera alferrik galdu dute. Amaieran, 1-2 Athleticentzat eta garaipenarekin 37 punturekin jarri dira zurigorriak. 6 jardunaldi falta dira Liga amaitzeko eta lanean jarraitu beharko dute bilbotarrek mailari eusteko lehia lehen bait lehen atzean uzteko.
Erlazionatutako sarrerak
04
Api
Egilea janirefragua
Athleticek urrezko garaipena eskuratu du gaur Mallorca 2-0 irabazita. Joko aldetik ezer gutxi erakutsi du Bilboko taldeak baina hiru puntuak ezinbestekoak ziren eta talderik eraginkorrenak irabazi du Katedralean. Yestek sartu du lehendabizikoa, Juradok markagailua berdindu eta Javi Martinezek garaipenaren gola egin du.
Partiduko 3. minutuan Yestek zurigorriak aurreratu ditu. Epaileak eskuak ikusi ditu Mallorcaren area barruan eta basauritarrak ez du hutsik egin. Ondo jarri zaizkio gauzak Athletici, baina markagailuan aurretik joanda ere, atzera egin du Caparrosen taldeak. Baloia utzi dio Mallorcari eta, zelai erdi oso ordenatuarekin, partiduaren erritmoa kontrolatu du. Aduriz izan da arriskurik handiena eraman duena Iraizozen ate ingurura, baina gaurkoan, ez da batere fin ibili Athleticeko aurrelari ohia. 27. minutuan Donostiarrak gutxigatik bidali du kanpora baloia. Beste aukera pare bat izan dituzte mallorcarrek atsedenaldia iritsi aurretik, baina Arangok eta Varelak ez dute asmatu.
Bigarren zatia hasi eta berehala, Manzanoren gizonek berdinketa lortzeko aukera izan dute baina Martiren jaurtiketa langatik gora joan da. Susto ederra hartu dute San Mameseko zaleek. Mallorca jaun eta jabe zen zelai erdian eta gainera ez zen defentsa zurigorriaren eguna. Eskerrak aurrelari mallorcarrak ez direla Athleticen hutsak aprobetxatzeko gai izan.
Adurizek buruz abisua eman du eta ekineanren ekinez, Mallorcak neurketa berdintzea lortu du. Zelai erdian zurigorriek galdu duten baloi baten ondoren, Arangok baloia eman dio Juradori eta honek jaurtiketa ederra atera du area ertzetik. Iraizozek ezin izan du ezer ez egin baloia desbideratzeko. 1-1ekoa.
Banakoarekin, Athleticek gorriak ikusi ditu baloia ukitzeko, baina futbolean edozer gerta liteke eta 1-2koa lortzetik, bilbotarrek garaipenaren gola egin dute. Iraolak Adurizen errematea atera du marratik bertatik eta kontraerasoan, Javi Martinezek sarera bidali du baloia. David Lopezek, eskuin hegaletik penalti puntuan jarri du baloia eta Iruñeako erdilariak
Lux gainditu du Athleticek bigarren zatian ate barruan egin duen jaurtiketa bakarrean.7 minutu falta ziren norgehiagoka amaitzeko eta Mallorcak ezin izan dio markagailuari buelta eman. Amaieran, 2-1 Athleticentzat. Arnasa hartu dute zurigorriek gaurko garaipenarekin baina jaitsiera postuak 5 puntura dituzte eta lan handia egin beharra dago Liga bukatu bitartean.
Erlazionatutako sarrerak
15
Mar
Egilea janirefragua
Athleticek hutsak oradaindu behar izan ditu bigarren astez jarraian. Barça izan zen aurreneko borreroa, eta gaurkoan, Real Madrilek Liverpoolen aurka jasotako porrota garesti ordaindu du Bilboko taldeak. Caparrosen mutilek lehen zatiko eurijasari eutsi diote, baina bigarrenean, jokalari bat gutxiagorekin aritu dira zurigorriak jokaldi eztabaidagarri baten epaileak Yesteri ateratako txartel gorriaren ondorioz, eta madrildarrek ez diete aukerarik eman. Robben, Heinze, Huntelaar (2) eta Higuainen golekin, 2-5 nagusitu da Juande Ramosen taldea.
Athletic etxeko lanak eginda zelairatu da, zer egin behar zuen ondo jakinda. Pixkanaka-pixkanaka, ordea, Real Madrilek partiduari neurria hartu dio eta arrisku handia sortu du, batez ere, eskuin hegaletik. Robbenek erraztasunez gainditu ditu atzelari zurigorriak eta erdilariaren barnealdi baten iritsi da, hain zuzen ere, madrildarren aurreneko gola. 2 jokalari gainditu ostean, Gorkak gelditu ezin izan duen jaurtiketa bikaina atera du Robbenek.
Behin Txapeldunen Ligatik kanpo, Real Madrilek etxeko torneoan jarri behar ditu indar guztiak eta horixe erakutsi du San Mamesen. Lehenbiziko gola sartu eta bigarrena lortzeari ekin diote madrildarrek. Lortu aurretik, Athleticek neurketa berdintzeko aukera izan du, baina Yesteren jaurtiketari bikain erantzun dio Casillasek. 34.ean Heinzek buruz egin du 2-0ekoa. Sneiderrek falta bota eta argentinarrak sarera bidali du baloia.
Athleticek, Katedraleko zaleen laguntzarekin eta bihotz baino joko gehiago jarrita partidua berdindu du. Bi minutu geroago, Heinzek, bere atean, aldea murriztu du. Orduantxe gertatu da norgehiagokaren aurreneko jokaldi eztabaidagarria. Yestek Casillas bultzatu du eta atezain madrildarrak kolpea puztu eta aurpegira eraman ditu eskuak. Epaileak sinistu dio eta txartel gorria atera dio Basaurikoari. Hortik aurrera, partidua handiegia gelditu zaio Muñiz Fernándezi.
Aldageletara joan baino lehen, Fernando Llorentek neurketa berdindu du Casillasen laguntzarekin. Aurrelariaren burukada bikaina Ikerrek ukitu eta barrura sartu du. 2-2 eta atsedena.
Bigarren zatia hasi eta partiduan sartzeko aukerarik utzi gabe, Real Madrilek hirugarren gola egin du. Huntelaarrek area barruan baloia jaso eta zutoin ondotik pasa den jaurtiketa batekin aurretik jarri du behin ere bere taldea.
Javi Martinezek Athletic partiduan sartzeko aukera alferrik galdu du 59.ean eta bi minutu geroago Huntelaarrek, berriz, norgehiagoka erabaki du erremate eder batekin. Epaileak bereak egiten jarraitu du eta aulkian zegoen Ion Velez eta talde zurigorriaren bigarren entrenatzailea, Luciano MartÃn kaleratu ditu. Partidua amaitzeko 5 minutu falta zirela epaileak Iraolak Marcelori egindako penaltia adierazi du. Higuainek bostgarrena.
Real Madrilek presioa eragiten jarraitzen du sailkapenaren bigarren postuan. Athletic, tartean, 6 puntura ditu jaitsiera postuak gaurko 2-5eko porrotaren ostean eta egoera arduratzeko modukoa izaten hasia da zurigorrientzat.
Erlazionatutako sarrerak
28
Ots
Egilea janirefragua
Athleticek 1-2 galdu du gaur Sevillaren aurka San Mamesen ez-ohiko talde batekin. 2 titular baino ez ditu zelairatu hasieratik Caparrosek Kopako finalerdietako entseguan, argi eta garbi utzita zein den gaur egun talde zurigorriaren lehentasuna. Asteazkenean, zalantzarik gabe, beste istorioa ikusiko da Katedralean.
Utrerako entrenatzailearen planteamenduak ez du fruiturik eman Sevillaren aurka. Ikusi denagatik, indar guztiak Kopako finalerdietako itzulerako neurketan jarriko ditu Bilboko taldeak. Bi teknikoen helburuak erabat ezberdinak ziren gaurkoan, izan ere, Manolo Jimenezek titular gehienak atera ditu 3 puntuak eskuratzeko asmotan. Caparrosen jomuga, ordea, aurkaria nekatzea izan da, eta lortu duen ala ez, asteazkenean ikusiko da.
Athleticek markagailuan aurrea hartu duen arren, Sevillak kontrolatu du partidua, erritmoa eta pilota. Lehendabiziko 20 minutuetan jaun eta jabe izan da eta gola egiteko aukera pare bat galdu ostean, zurigorrien gola iritsi da. Korner baten, Etxeitak buruz ukitu du baloia eta Sevillako defentsak aldaratzean egindako hutsa Gabilondok aprobetxatu du 1-0ekoa egiteko. 26. minutua zen eta golarekin Athletic suspertu egin da. Presioa eragin, baloiaz jabetu eta arazoetan sartu du Sevillako taldea.
Irudikeria baino ez da izan, ordea. 12 minutu geroago Kanoute agertu baita norgehiagoka berdintzeko. Balenziagak huts galanta egin du area ertzean baloia aldendu barik, Mosquerari emanda. Kolonbiarrak erdiratu eta Kanoutek bikain kontrolatu du baloia sarera bidaltzeko.
Aldageletatik bueltan gauzak ez dira aldatu. Baloiaren jabe jarraitu du Sevillak eta bere jokoak saria izan du 12. minutuan. Romaricek pase ederra sartu dio sakonean Kanouteri eta Maliko aurrelariak, behin ere, baloia kontrolatu, defentsa gainetik kendu eta jaurtiketa gurutzatu batekin Armando gainditu du.
Athletic ez da erantzuteko gai izan. Neurketako azken minutuetan Toquerok eta Iñigo Velezek partidua berdintzeko bi aukera izan dituzte baina gola ez da iritsi.
Alpeetako lehen etapan punturik gabe gelditu dira zurigorriak. Burua, ordea, tarteko beste helmuga baten jarrita daukate jokalariek, Caparrosek eta San Mameseko zaleek. Asteazkenean, gaurko estrategiari etekinik atera dioten ikusiko da.
Erlazionatutako sarrerak
Atalak: 
Etiketak: 
